Bakit
Napakahalaga ng Edukasyon?
Carl Angelo Mateo Caluag
Araw-araw ay nakakakita tayo ng mga kabataang maagang
pumapasok sa paaralan. Ang ilan ay may dala-dalang aklat, notbuk, at panulat;
ang iba nama’y simpleng kuwaderno na pinaglumaan na ang tanging dala. Ang ilan
ay naglalakbay ng napakalalayong distansya, sumasakay sa iba’t ibang uri ng
sasakyan; ang iba’y naglalakad lamang dahil malapit ang eskwela o dili kaya’y
walang pambayad. Malalaki ang baong salapi ng ilan; ang iba’y piso o dalawa ay
ayos na. Iba man ang mga paraan at gawi ng mga estudyanteng Pilipino sa bayan
at sa lalawigan, mayaman man o mahirap, nabibigkis sila ng parehong
pinagkakaabalahan: ang pag-aaral.
Gaano ba ka-espesyal ang edukasyon? Bakit libu-libong
salapi ang nagagastos para rito? Bakit halos lahat ng mga magulang ay
nagsusumikap na mapag-aral ang kanilang mga anak? Halos naging pangunahing
pangangailangan na rin ang edukasyon. Maraming mga pampubliko at pampribadong
paaralan ang matatagpuan kahit saanmang dako ng bansa. At tila may mga
nadaragdag pa.
Edukasyon, ayon sa kasabihan, ay ang natatanging kayamanang
maipapamana ng isang magulang sa kanyang anak, isang bagay na hindi kailanman
mananakaw. Totoo naman. Walang magpapatakbo ng lipunan kung walang mga edukado.
Propesyunal man o simpleng gradweyt ng hayskul, basta’t nagkaroon ng pormal na
pag-aaral, ay maibibilang sa mga mamamayang may malaking abilidad na makatutulong
sa pamayanan. Mabibigyang karangalan din ng mga edukado ang kanilang pamilya,
angkan, at bayan. Nagiging disiplinado at maayos ang takbo ng buhay ng isang
tao kung siya’y edukado.
Ang ating mga lider ng pamahalaan ay hindi magiging mahusay
kung hindi rin naman sila nakapag-aral, lalo’t sila’y nakapag-kolehiyo sa mga
matataas na antas na unibersidad. Ang mga desisyon na kanilang naipapasya para
sa ikauunlad ng bayan ay nag-ugat sa mga naituro ng kanilang mga guro’t
propesor at nabasang impormasyon sa mga teksbuk. Hinubog ng edukasyon mula
kindergarten hanggang kolehiyo ang malaking bahagi ng kanilang pagkatao.
Marapat lamang na pagtuunan ng napakalaking pansin ang pagbibigay ng edukasyon
sa kahit anong antas ng tao upang sumulong din ang bayang kanilang
pinagsisilbihan.
Maaari na ba nating masagot kung bakit napakahalaga ng
edukasyon?
No comments:
Post a Comment